Dhoma Kombëtare e Prodhuesve të Veshjeve dhe Drejtoria e Përgjithshme e Tatimeve, me mbështetjen e Agjencisë Gjermane për Bashkëpunim Teknik, GTZ, në kuadrin e Programit të Zhvillimit Ekonomik në Shqipëri dhe në vijim të bashkëpunimit institucional në ndihmë të bizneseve fasoniste, organizuan në një nga sallat e Grand Hotel Europa në Shkodër, tryezën e rrumbullakët me temë: “Ligji i ri i Procedurave Tatimore, deklarimi on-line i detyrimeve tatimore dhe problemet e biznesit fasonist në marrëdhëniet me Drejtorinë Rajonale të Tatimeve”.

Në këtë takim merrnin pjesë sipërmarrje të njohura të qytetit të Shkodrës në fushën e prodhimit të veshjeve për eksport, drejtuesit kryesorë të Dhomës Kombëtare të Prodhuesve të Veshjeve, përfaqësues të GTZ, ekspertë dhe drejtuesit kryesorë të Drejtorive Rajonale Tatimore Shkodër dhe Lezhë, etj.

Pas ofrimit të shërbimit të shkarkimit të deklaratave tatimore nëpërmjet internetit, bizneset konfeksioniste të Shkodrës janë të parët që iu mundësua njohja dhe trainimi me shërbimin e ri të plotë të deklarimit të të gjitha detyrimeve on-line si dhe pagimi i këtyre detyrimeve në mënyrë elektronike nëpërmjet bankave të nivelit të dytë pasi që nga data 1 Nëntor edhe tatimpaguesit e Shkodrës janë përfshirë në skemën e deklarimit dhe pagesës on-line të detyrimeve tatimore.

Drejtori i Shërbimeve në DPT, z. Erion Prifti i njohu përfaqësuesit e këtij grupimi të biznesit, si një nga më të mëdhenjtë dhe më të rëndësishmit në rrethin e Shkodrës, me thjeshtësinë dhe lehtësinë që ofron sistemi elektronik i deklarimit të detyrimeve tatimore dhe shpjegoi kostot që përfiton biznesi nga ky shërbim.

Z.Prifti konfirmoi se sistemi i instaluar nën frymën e reformimit dhe modernizimit të mëtejshëm të sistemit tatimor në Shqipëri, të mbështetur dhe nga projekti i Sfidës së Mijëvjeçarit për Shqipërinë, i administruar nga USAID, iu jep përgjigje shumë pyetjeve dhe shqetësimeve që lidhen me administrimin tatimor, të cilat tashmë iu ofrohen në mënyrë elektronike bizneseve të interesuara, në një kohë tepër të shkurtër.

Në përfundim të takimit u sqaruan në detaje procedurat e reja elektronike të deklarimit on-line të të taimeve dhe u praktikuan përvojat më të mira në fushën e deklarimit elektronik të tatimeve.